ကြက်သားပေါက်ဆီ အိအိလေး

ကြက်သားပေါက်ဆီ

ကြက်သားပေါက်ဆီလေး အပျင်းပြေလုပ်စားဖြစ်ပါတယ် မာမာ့သမီးလေးလုပ်ထားတာပါ မာမာက မုန့်လုပ်ရတာစိတ်မရှည်သလောက် သူကတော့အရမ်းကိုစိတ်ရှည်ပါတယ် ဒီနေ့လဲမေမေရေ ပေါက်ဆီလုပ်စားရအောင်ဆိုတာနဲ့ သူ့ကိုအာဏာကုန်လွှဲပြီးမာမာနားနေလိုက်ပါတယ် တစ်ရက်တစ်လေ ရတဲ့နားရက်လေးပေါ့နော်။
သူလုပ်တဲ့ပေါက်ဆီလေးတော်တော့်ကိုစားကောင်းပါတယ် လုပ်နည်းလေးအဆင့်များပေမဲ့ စားရတာကောင်းတော့ သူပင်ပန်းတာလေးပျောက်သွားတာပေါ့နော်။သူစိတ်ရှည်လက်ရှည်လုပ်ထားတဲ့ပေါက် ဆီလုပ်နည်းလေးကို မာမာ မျှဝေပေးလိုက်ပါတယ်
သူလုပ်တဲ့ဂျုံက ရိုးရိုးဂျုံမို့ ပေါင်းလိုက်တဲ့အခါမှာနဲနဲလေးအညိုရောင်ဘက်ပြောင်းသွားတဲ့ပေါက်ဆီမျိုးပါ ဒါပေမဲ့ဘာမှမဖြစ်ပါဘူး အညိုရောင်လေးနှစ်သက်တဲ့သူတွေအတွက်ပေါ့ အဖြူရောင်နဲ့အရသာကတော့ အတူတူပါဘဲ ဂျုံသားအရသာလဲအတူတူပါဘဲ သုံးတဲ့ဂျုံအမျိုးအစားပေါ်မူတည်ပြီး အရောင်လေးဘဲ ကွာသွားတာပါ အလုပ်အားတဲ့ရက်တွေမှာမိသားစုတွေပျော်ပျော်ပါးပါး
လုပ်စားကြတာပေါ့နော်။
ပါဝင်ရမှာလေးတွေက

ပေါက်ဆီအပြင်ခွံအတွက်

• 1 1/2 cup plain flour
• 1 tsp dry yeast
• 1/2 cup ရနွေး
• 1/2 tsp သကြား 
• 1/4 tsp ဆား
• 1 tbs ဆီ

 ပေါက်ဆီအပြင်ခွံအတွက် လိုအပ်တာလေးတွေပြင်ပါတယ်

ပါဝင်ပစ္စည်းတွေကိုရောပြီး yeast ပျော်တဲ့အထိအရည်ဖျော်ပေးကာ ပျော်လာပါကဂျုံမှုန့်နှင့်ရောပြီး ဒိုးသားရအောင် နယ်ပါမယ်

ဂျုံသားကိုချောလာပြီးလက်မှာမကပ်တော့တဲ့ထိ ဆယ်မိနစ်လောက် နှဲပေးပါ
နှဲပြီးသားဂျုံလုံးကိုလေလုံအောင်ပိတ်ပြီး နွေးသောနေရာတွင်တစ်နာရီလောက်ထားပေးပါ

ဂျုံသားပွအောင်စောင့်နေချိန်နေမှာ အစာအတွက်အသားနှင့်အသီးအရွက်များကိုပြင်ပြီး ချက်ပါမယ်

 ပေါက်ဆီထဲထဲ့ဖို့ အစာအတွက်လိုတာလေးတွေပြင်ပါတယ်

• 1/2 cup လေးထောင့်သေးသေးလေးတွေတုံးထားသောကြက်သွန်နီ
• 1/2 cup ခပ်ရွယ်ရွယ်လှီးထားသောဂေါ်ဖီ 
• 1/2 cup အနေတော်လှီးထားသောကြက်သွန်မိတ် 
• 1/4 cup လေးထောင့်ခပ်သေးသေးလှီးထားသောမုံလာဥနီ 
• 1/2 tbs ဆား 

(အားလုံးကိုရောနယ်ပြီးဆယ်မိနစ်လောက်ထားကာ ထွက်လာသောအရည်များကို ညှစ်ပေးပြီးမှကြော် ပါတယ်)

အသီးအရွက်နှင့်ရောပြီးကြော်ရန် အစာအတွက်အသားကိုပြင်ပါမယ်

• 200 g ခပ်သေးသေးလေးများတုံးထားသောကြက်သား  
• 1/2 tsp ပဲငံပြာရည် 
• 1/4 tsp ငရုတ်ကောင်းမှုန့် 
• 1/2 tsp ဆား
• 1/2 tsp နှမ်းဆီ
• တစ်မွှာ ကြက်သွန်ဖြူ 
• ကြက်ဥနှစ်လုံးကိုပြုပ်ပြီး - ရှစ်စိတ်စိတ်ပေးပါ(ကြက်ဥဓါတ်ပုံရိုက်ဖို့မေ့သွားပါတယ်)

အိုးထဲတွင်ဆီထဲ့ပြီးပူလာပါကကြက်သားကို အရင်ဆုံးသုံးမိနစ်လောက်ထဲ့ကြော်ပေးကာ ကြက်သားထဲသို့အသီးအရွက်များကိုနောက်ဆုံးမှနှစ်မိနစ်လောက်ထဲ့ပြီးကြော်ပေးပါတယ်

တစ်နာရီလောက်အချိန်ကြာပါက ဂျုံသား နှစ်ဆပွလာထိရပါလိမ့်မယ်

ပွလာသောဂျုံသားကို ရှစ်ပုံပုံကာအလုံးလေးများရအောင် လက်မနှစ်ဖက်ဖြင့်ဂျုံသားကိုဖြန့်ပြီးပြန်ပြန် လုံးပေးပြီး လက်ဝါးနှစ်ဖက်ကြားမှာထဲ့ပြီးလုံးပေးပါက ဂျုံလုံးလေးမျာရလာပါလိမ့်မယ်

စောစောကလုံးထားသောဂျုံလုံးကို ဒလိမ့်တုံးနှင့်လှိမ့်ပြီး ၁၀စင်တီမီတာလောက်ရအောင်လှိမ့်ပေးပါတယ် ပြီးမှ အစာနှင့်ဘဲဥထဲ့ကာ ဂျုံအနားသားများကိုဆွဲယူပြီးအုပ်ပေးပါတယ်

 ကြိုက်နှစ်သက်သလိုပုံစံလေးများ လုပ်ပေးနိုင်ပါတယ်

ပေါင်းလျှင်အိုးတွင်မကပ်စေရန် baking paper စက္ကူလေးများခံပြီးပြီးပေါင်းပေးပါတယ်

ရေနွေးဆူဆူကိုအောက်တွင်ခံပြီး ပေါင်းခံအိုးတွင်ပေါက်ဆီကိုထဲ့ကာ မိနစ်နှစ်ဆယ်ခန့်မီးပြင်းပြင်းနဲ့ ပေါင်းပေးပါတယ်

အနားသားအတွန့်လေးနဲ့လုပ်ထားတဲ့ ကြက်သားပေါက်ဆီ အိအိလေးရပါပြီ

ဝိုင်းဝိုင်းလေးလုံးထားတဲ့ ကြက်သားပေါက်ဆီ ပူပူမွှေးမွှေးလေးပါ

 

Credit To : Mar Mar Lwin